Home - Concursc de foto - Concurs ann 2022 _ Formes y geometries
premiatiEn sabeda ai 12 de novëmber él sté tla sёnta dl Istitut Ladin "Micurá de Rü" la daurida dla mostra y la premiaziun dl concurs dl Fotoclub Val Badia. Le tema chirí fora é "Formes y goemetries"; Claudio Debiasi y Ulrike Ploner tol ite i pröms trëi posć.

Foto1: Dmc le presidënt dl Fotoclub Val Badia Helmut Elzenbaumer, Claudio Debiasi (1., 3., 5. y 9. post), Ulrike Ploner (2., 4. y 8. post), Jep Taibon (10. post) y Silvia Passoni (7. post). Al mancia Rudi Moling, che á arjunt le 6. post.
Chësc ann á le Fotoclub Val Badia indô podü organisé dötes les manifestaziuns en presënza. Insciö ince la daurida dla mostra cun la premiaziun dl concurs dal tema

»Formes y geometries«. Le coronavirus, la vera tla Ucraina y le cambiamënt climatich á dessigü mudé le monn y an se damana sce an vëiga chësc tles fotografies di membri dl Fotoclub. Le titul de chësc ann nes dëida capí a ci che i ti dun importanza te chësc tëmp. Cun fotografies plënes da corú inviunse düc da ti ciaré cun positivité al monn te chësc tëmp por tröc nia saurí.

Le Fotoclub á orü organisé na mostra y nia ma val' de online, por mostré i laurs di fotografs dal lockdown cina ala vita cun le virus y la vera. Por valgügn mëisc sunse stá coliá cun le monn tres internet y chësc nes á ince metü dan i edli sciöche döt pó se mudé da n de al'ater. La tecnologia y la fotografia pó nes daidé, sce i orun nes confronté cun nosc tëmp. Tl lockdown él sté tröc fotografs che á comuniché cun i social media y á mostré insciö sü laurs. Vigni fotograf á fat sües esperiënzes y á podü se fá sü pinsiers sön ci orëi mostré. Chësc é n evënt particolar por le Fotoclub Val Badia; al é le pröm iade che al mëss se confronté cun na te' situaziun. Cun le »restart« é spo düc i mëmbri dl Fotoclub indô piá ia cun gran motivaziun y á porvé da presenté fotografies interessantes por la mostra anuala. Sambëgn se damanon ci che ai ó nes mostré do na te' esperiënza personala che se á fat capí che döt le monn é atoché da chëstes situaziuns.

La fotografia liëia
Sce i baiun de n lingaz che liëia adöm la jënt aldedaincö, podunse sigü dí che la fotografia é buna da porté pro a chësc fin. Ponsun ma a sciöche i adorun le fonin: tl monn vëgnel fat miliarg de fotografies y tröpes röia atira sön i social. Chësc n'ó dî nia dí che ares é ince de cualité. Tla mostra a San Martin á la juria porvé da chirí fora fotografies de cualité, por ti les mostré a n publich interessé. La mostra dess i dé ai fotografs la poscibilité da comuniché cun la fotografia y l'interes dl publich pro la daurida é sté gran.

Formes y geometries
Pro le tema chirí fora en chësc ann, á le Fotoclub orü dé la liberté da chirí le motif ideal por le concurs. Porchël él sté vigni fotograf che á chirí na atmosfera particolara y les esperiënzes individuales á sigü ince influenzé le resultat. Les fotografies é gnüdes fates te posć desfarënc, mo impó él le tema che les liëia adöm. An pó baié de n iade che nes condüj tl monn dles formes y geometries; ares comunichëia danter ëres. La fotografia á te chësc caje la funziun da nes mostré cosses a chëres che nos ne ti dun tl pröm momënt degöna importanza. Al é fotografies che ó nes mostré formes dër interessantes, plënes de contradiziuns, corusc stersc y contaminaziuns de plü cultures. Le conzet dl Fotoclub é sigü chël da trá ite jënt cun les idees plü desvalies.

La comisciun y premiaziun
La juria dl concurs ê metüda adöm dai fotografs Ivan Castlunger, Norbert Scantamburlo (presidënt dl Fotoclub da Bornech), Sepp Hackhofer (ex presidënt di Strix) y Helmut Elzenbaumer (presidënt dl Fotoclub Val Badia). Ara á messü chirí fora danter tröpes fotografies y les plü beles é gnüdes metüdes fora pro la mostra.
Le pröm post é gnü arjunt da Claudio Debiasi. Cun süa spontaneité y vëia da porvé fora cosses nöies, nes mostrel val' dër de interessant. So laur desmostra che al sá da lauré cun les linies tleres y i corusc é ince dër bi. An vëiga l'ironia de nüsc tëmps, olache i pici toc fej fora le gran. Le secundo post i é jü a Ulrike Ploner. Cun süa fotografia de livel dër alt desmostera che ara é buna da mëte le focus sön les formes y geometries. Gran pëis ti vëgnel dé ala löm y ala natöra y la fotografia inviëia a na reflesciun y a ti ciaré a formes che nos ne odun nia vigni de. Les formes geometriches condüj tl monn dla meditaziun, tla fotografia él n gran chît. Al terzo post é indô rové Claudio Debiasi, che mët la fotografia enigmatica al zënter. Les formes y geometries vëigon dër bun en combinazun cun püc corusc. Al é n stüde de formes y corusc, olache nia ne i vëgn surandé al caje y olache an vëiga le prozes che le fotograf á fat por arjunje le travert. Le fin é n minimalism tla fotografia.
I atri fotografs che é rová ti pröms diesc é Ulrike Ploner (4. y 8. post), Claudio Debiasi (5. y 9. post), Rudi Moling (6. post), Silvia Passoni (7. post) y Jep Taibon (10. post). A düc chi che á tut pert ti vál n gran complimënt, ai s'á dër porvé! Les fotografies sará spo da odëi te internet sön la plata dl fotoclub Val Badia. La mostra tl salf dl Istitut Ladin a San Martin restará indere daverta cina ai 25 de novëmber, tratan i orars de daurida dl Istitut.

Rudi Moling, por le Fotoclub Val Badia
1_post_Claudio_Debiasi 02-Ulrike_Ploner-la_tenora_dl_aragn 3_post_Cluadio_Debiasi
1° post Claudio Debiasi: Uno sguardo sulla strada 2° post Ulrike Ploner: la tënora dl aragn 3° post Claudio Debiasi: Percorso obbligato
 

04-Ulrike_Ploner-architetra_dla_natra 01-Claudio-Debiasi-Aspettando_il_tramonto 01_M1
4° post Ulrike Ploner: Archietüra dla natüra 5° post Claudio Debiasi: Aspettando il tramonto 6° post Rudi Moling
Verso_lignoto 02-Ulrike_Ploner-bosch_n_p_atramnter 04-Claudio_Debiasi-Creazione-
7° post Silvia Passoni: Verso l'ignoto 8° post Ulrike Ploner: Bosch en pü atramënter 9° post Claudio Debiasi: Creazione
3._Taibon_Jep-Mersces 105-Stp_de_flu 102-Ficiuns_de_pera
10° post Jep Taibon: Mersces Alfred Erardi: Stöp de flu Alfred Erardi: Ficiuns de pera
05-Claudio-Debiasi-Tenssitura_naturale 03-Ulrike_Ploner-tra_de_aragn_plna_de_perles Geometrie_fuorvianti
Claudio Debiasi: Tessitura naturale Ulrike Ploner: Tëra de aragn plëna de perles Silvia Passoni: Geometrie fuorvianti
 

 
Concursc di agn passá: Concursc