La morvëia dla natöra d'altonn

"Altonn" ê le tema dl concurs fotografich che le Fotoclub Val Badia a metü a jí chësc ann. En sabeda dan otedé él gnü tigní la premiaziun

Na contrada sugestiva cun lëgns da fagher che descëda morvëia y trasmët armonia. Les fëies é oramai cöcenes, depëntes dales frescöres dl altonn. Denanche lascé ia süa brancia y lascé zoruch les rames bludres, se visteres ciamó n iade le plü bel guant. Chësc é le motif coiü cun l'aparat da Ulrike Ploner da Badia – y ince le motif cun chël che ara á davagné l'ediziun 2025 dl concurs de fotografia metü a jí dal Fotoclub Val Badia. "Altonn" ê le tema, che á ispiré deplü fotografs dla valada y nia ma.

En sabeda dan otedé él sté tl gran salf dl Istitut Ladin la premiaziun dl concurs, cun daurida dla mostra. Dötadöm él gnü mené ite 34 retrac, che é gnüs valutá dala juria metüda adöm da Sepp Hackhofer, Carlo Dapoz, Samuel Debon, Ivan Castlunger y Helmuth Elzenbaumer. Premié gnôl, sciöche zënza, i pröms 10 classificá. Dlungia le pröm post cun i lëgns da fagher, á Ulrike Ploner ince arjunt le 3. post, cun le motif de n manëster amez na contrada da nëi. Cun le 2. post él gnü premié le fotograf Alfred Erardi da Arnpurch/La Val, che á tigní toch la contrada da coi oramai rosc dla munt de Senes, injopá da bröma y ciarü. I atri fotografs premiá é Claudio Debiasi (4. post), Jep Taibon (5. y 7. post), Walter Oberlechner (6., 8. y 10. post) y ciamó n iade Alfred Erardi al 9. post.

Sciöche dit, él cun la premiaziun ince gnü daurí na mostra, che é da odëi tl gran salf dl Istitut Ladin fina ala fin de novëmber. Ara é daverta dal lönesc ala jöbia dales 10:00 ales 12:00 y dales 14:00 ales 17:00. pablo