Home - News - Le paesaje tl focus dl fotoclub
02_fotoEn vëndres, ai 30.7.21, él sté tla sёnta dl Istitut Ladin "Micurá de Rü" la daurida dla mostra dl Fotoclub Val Badia cun le tema "Le paesaje tles vals ladines". 

Al é bele passé plü co n ann che le Fotoclub Val Badia ne fej plü degönes proieziuns y mostres tl Istitut Ladin "Micurá de Rü". La uniun ne urô nia ma se presenté te na forma virtuala y porchël ara aspeté che döt foss indô davert. Düc se aspeta n pü' de normalité y sëgn d'isté vara da organisé na mostra di membri di fotocblub, mo messun tigni cunt che al é n gran laur doia. Te chësc tëmp sun düc inviá da se tigní ales normes de securëza sce an vá a vijité na mostra. N avenimënt cultural sciöche na vijita a na mostra vir ince dla jënt che vá a ti ciaré ales fotografies, al dess nascer n dialogh. Do le lockdown da d'aisciöda ti ciara i membri dl fotoclub cun gran otimism al dagni y inviëia la jënt da jí a ti ciaré ala mostra. Ince le Fotoclub Val Badia oress porté pro che la vita culturala tla Val Badia mostres sëgns de vita.
Tl zënter dla mostra an orü mëte le paesaje tla Ladinia che düc conësc y che turisć da döt le monn vëgn vigni ann a amiré. Pro le paesaje baiunse de n valur de gran importanza, la natöra é n post olache i stun dër saurí, y te chësc tëmp de pandemia dër chiri. La parora paesaje é de gran atualité, ponsun al monn dl turism y ales parores ecologia y ambiënt. N l'alt ala natöra é bele sté San Francësch che á fat tl "Cantico delle creature" y vigni generaziun dess porvé de sconé la natöra. Ince i artisć che á scrit la storia dl'ert á orü mëte le paesaje tl zënter de so laur, ponsun ma a Caspar David Friedrich y Vincent van Gogh. Chilo da nos él le Dolomiti Unesco che dëida che nosta natöra vëgnes sconada y te chësc ambiënt él i fotografs dl fotoclub Val Badia che vá a chirí i posć de morvëia y spo ói partí les emoziuns cun düc chi che vá a ti ciaré ala mostra a San Martin. Le paesaje che i fotografs mostra á ince da fá cun na identité ladina, al vëgn mostré i posć olache i viun y se stun saurí cun nostes tradiziuns y lingaz. Cun chësta mostra él i fotografs che ó se mostré che la tera ladina dess gní sconada y dada inant ales atres generaziuns.

La mostra restará daverta cina en mertesc, ai 31 de agost, tratan i orars dla biblioteca dl Istitut.

Fotografs che tol pert ala mostra a San Martin:

Castlunger Ivan

Costabiei Uli

Dapoz Carlo

Erardi Alfred

Elzenbaumer Ester

Elzenbaumer Helmut

Pescoll Andreas

Ploner Ulrike

Ploner Frida

Rungger Florian

Sottara Freddy

Tolpeit Zeno



Rudi Moling