Home - News - Parcs naturai, online la plata internet nöia cun contignüs por ladin
918340__no-name_Vijité la belëza dles munts südtirolejes te na manira comota da ciasa? Da inier é la plata internet nöia online cun informaziuns ince por ladin.
I set parcs naturai, plü la pert südtiroleja dl parch nazional dl Stelvio: chësc é le contignü prinzipal dla plata internet nöia dedicada ai parcs naturai y che é online dai 14 de merz ala misciun http://parcs-naturai.provinzia.bz.it. De plü é ince i contignüs por ladin y che reverda dantadöt le parch natural Fanes-Senes-Braies y le parch natural Pöz-Odles cun informaziuns d'ütl sön le habitat, stüdi, relevamënc, escursciuns acompagnades fora por la natöra y rodes tla natöra.

Sön la plata prinzipala él ince da ciafé na cartina interativa che consënt da avëi n azes ai 7 parcs naturai y al parch nazional. Implü ciafon sön la plata informaziuns de basa sön les Ciases de vijita y d'atres strotöres, informaziuns sön la flora y fauna, sön les escursciuns acompagnades cun ince la poscibilité da programé spazirades y gites. Na seziun é ince dedicada ales Dolomites sciöche patrimone mondial UNESCO. Al vëgn ince presenté scomenciadies sciöche i Junior Ranger y na seria de publicaziuns interessantes.

„I orun renforzé le status di parcs naturai südtirolej – comentëia l'assessur Richard Theiner – y na pert de chësta strategia é naturalmënter la presënza online. Le Südtirol á n patrimone natural unich che é n valur ajuntif por chi che vir te chësc teritore y ince por chi che vëgn en vacanza". Contënta dla realisaziun dla plata internet nöia é ince l'assessuria por l'informatica Waltraud Deeg che sotlignëia che „le proiet de amodernamënt dla presënza web dla Proivnzia de Balsan é de importanza strategica por ti alisiré ai zitadins l'azes ai sorvisc y ales informaziuns che porta ince para n aumënt de efiziënza por l'aministraziun provinziala."