 N'iniziativa dedicada ales munts cun deplö apuntamënc culturai y sportifs por valorié le mëis de setëmber. Le highlight dl'iniziativa é la mësa torona adüm al alpinist Reinhold Messner en program le mertesc ai 6 de setënber.Vire les Dolomites é na manifestaziun metüda a jí da pert dl Consorz Turistich Alta Badia, tratan chëla ch'al vëgn pité deplö incuntades liades a nostes munts y ala natüra por valorisé le mëis de setëmber cun sü bi corusc. Dai 4 ai 25 de setëmber vëgnel organisé conzerc, referac y presentaziuns tles sales manifestaziuns di paisc dl'Alta Badia mo ince defora amesa la natüra ite. Highlight de chësta iniziativa é dessigü la serada dedicada ala storia dl alpinism dl Sas dla Crusc cun l'alpinist conesciü sura düt le monn Reinhold Messner. Adüm a Messner sarale i alipinisć Heinz Mariacher, Nicola Tondini y Simon Gietl che tëgn na mësa torona en mertesc ai 6 de setëmber dales 21:00 tl salf dles manifestaziuns da La Ila.  Le jöbia ai 8 de setëmber podaran ascuté sö l'alpinist Christoph Hainz tl salf dles manifestaziuns da Corvara dales 20:30 inant. En chësta ocajiun gnarale ince mostré le film "Der Zinnenmann", che baia de sües esperiënzes y aventüres. Düc i interesciá pó tó pert al'escursciun adüm al alpinist en vëindres ai 9 de setëmber. An se incunta dales 08:25 dan l'ufize turistich da Corvara por jí sön le Cir y spo sön Sass Ciampac.Dlungia a chisc dui apuntamënc sarale n grüm de atri evënc en program dai 4 ai 25 de setëmber sciöche i conzerc de müjiga tradizionala alalergia sön Col Pradat la domënia ai 4 de setëmber y sö La Crusc la domënia ai 11 de setëmber, le referat sura la geologia adüm ala duturia Kustatscher ai 7 de setëmber a Calfosch, deplö proieziuns de diapositives y de films da sëra tles sales manifestaziuns o le curs da cujiné spezialites ladines le mercui ai 7, 14 y 21 de setëmber. Intratan les edemes de Vire les Dolomites vëgnel ince pité deplö escursciuns adüm a na guida, sciöche l'escursciun al ander de Conturines en program vigni jöbia o la escursciun sön Lagació y jö por les galaries dla prüma vera mondiala vigni vëindres. Deplö informaziuns y prenotaziuns pro les Assoziaziuns Turistiches. |
 | FotoClub Val Badia – Strada Pares, 10 – 39030 La Val – Cod.Fisc.: 98020920218 - mail: fotoclubvalbadia@rolmail.net
|