 Al é de zirca 1,5 miliuns de euro le finanziamënt preodü por i laurs ti Parcs naturai y al'intern di biotops y de monumënc naturai. Cun le scomenciamënt dl isté él ince i Parcs naturai che s'arjigna ca por ti pité ai vijitadus stotöres tres plü modernes. Por chësta gaujia á la Junta provinziala aprové incö (ai 24 de ma) na soma de 1,2 miliuns de euro por l'esecuziun de laurs, cun l'ajunta de atri 257mila euro por biotops y di monumënc naturai. La pert plü grana dl finanziamënt ti vëgn assegnada ai Parcs naturai cun n investimënt de 610mile euro por intervënc ti set parcs natuai che vëgn manajá dala Provinzia. Indöt 170.000 euro ti é gnüs assegná al Parch natural Texelgruppe, 150mile podará gní anuzá dal Parch natural Fanes-Senes-Braies y indöt 80mile euro ti jará al Parch natrual Trëi Pizes de Lorëi y al Parch natural Riesenferner-Ahrn. „Tres chisc investimënc sarál poscibl da garantí la manutenziun ordinara y straordinara dles sëmes y di trus, sciöche ince laurs d'ajornamënt dla segnaletica y dles operes de re-naturalisaziun y de ressanamënt", á comenté l'assessur competënt Richard Theiner. Cun le passaje dles competënzes dal Stat ala Provinzia messará l'Aziënda Bosć y demane fá plü laurs tl Parch nazional dl Stelvio. Cun i 600mile euro metüs a desposiziun gnarál finanzié les spëises ordinares (180mile euro) mo ince investimënc (420mile euro). „Ti diesc Comuns dl Parch dl Stelvio gnarál lauré dantadöt sön la rëi dles sëmenes tres le ressanamënt y le metüda en segurëza di trus y dla segnaletica", á splighé Theiner. Por sconé, conservé, sistemé y ressané l'ambiënt natural y paesajistich ará l'Aziënda Bosć y demane y l'Aziënda por la proteziun zivila a desposiziun 257mile euro por la realisaziun de intervënc al intern di biotops y monumënc naturai. |
 | FotoClub Val Badia – Strada Pares, 10 – 39030 La Val – Cod.Fisc.: 98020920218 - mail: fotoclubvalbadia@rolmail.net
|