Comuns tl raiun Dolomites UNESCO: planifiché deboriada na strategia

Home - News - Comuns tl raiun Dolomites UNESCO: planifiché deboriada na strategia

Les strategies futures é stades la tematica zentrala dla manifestaziun dl Ofize Parcs naturai organisada por i Comuns tles Dolomites patrimone UNESCO.

Pian ia dala condiziun che na gestiun otimala dles Dolomites patrimone mondial UNESCO é ma poscibla tres la condivijiun dles conescënzes y dla colaboraziun strënta di auturs interessá á l'Ofize Parcs naturai organisé inier (ai 19 de ma) a Balsan la manifestaziun „Strategies por le dagní" por aprofondí adöm cun i Comuns, i rapresentanc di parcs naturai dles Dolomites y dl grup de laur permanënt dl patrimone UNESCO les scomenciadies de sensibilisaziun por le dagní. „La merscia mondiala é n gran reconoscimënt mo ince n impëgn che mët al pröm post le conzet de sconanza y nia la comerzialisaziun turistica", á dit l'assessur provinzial por l'ambiënt Richard Theiner. L'obietif é chël da armonisé les tematiches dla proteziun y dl svilup dl'area dolomitica, insciö Theiner.

Piero Gianolla dl'Université de Ferrara, consulënt dla Fondaziun Dolomites UNESCO, á rajoné dl'importanza y di efec dl reconoscimënt mondial, Umberto Martini dl'Université de Trënt á aprofondí le management dles destinaziuns dles localités dolomitiches, che mëss ester a öna ince cun les diretives dl'UNESCO. La direturia dla Fondaziun, Marcella Morandini, ti é jüda a funz te so referat ales strategies de gestiun y dl tursim dl patrimone mondial y che é la basa por n svilup sostenibl dl'area ti proscims agn. „Ares contëgn na seria de propostes de valorisaziun y mioramënt che podará ma gní atuades sce düc i Comuns dëida para", á dit Morandini.

Implü él ince gnü organisé na debatüda sön le dagní dl tursim tl'area dolomitica cun i hoteliers Michil Costa y Werner Putzer, Gerhard Vanzi dl setur marketing de Dolomiti Superski y le mënacrëp y vizeombolt de Braies Erwin Steiner. I proscims vari che reverda la gestiun y le svilup dl'area sot a sconanza por ci che reverda la pert südtiroleja é gnüs portá dant da Enrico Brutti, Elisabeth Berger y Renato Sascor dl Ofize Parcs naturai. Al á ince damané ai rapresentanc di Comuns da presenté sües priorités y i proiec concrec por lauré inant ala planificaziun concreta dl proiet Dolomites UNESCO.