 Por l'isté 2016 chir l'Ofize Parcs naturai dla Provinzia assistënc por le sorvisc sajonal che reverda la proteziun natöra ti 7 parcs südtirolej. Les domandes de partezipaziun mëss gní dades jö cina ai 4 de merz. Le sorvisc d'informaziun y de educaziun ambientala é dui di compic prinzipai di colaboradus por la sajiun da d'isté ti parcs naturai dl Südtirol. Le laur di assistënc é fondamental por na gestiun efiziënta dles arees sot a sconanza, dantadöt por ci che reverda la sensibilisaziun da mantigní le dërt comportamënt tratan les vijites y escurjiuns. Le sorvisc sajonal de proteziun natöra reverda la spana de tëmp danter lugio y setëmber, ma por i trëi parcs naturai Trëi Pizes de Lorëi, Puez Odles y Monte Corno (Trudner Horn) vëgnel chirí personal por sis mëisc da má a otober. Chisc é i compic preodüs: sostituziun tla gestiun dles Ciases di parcs naturai, planificaziun dles vijites acompagnades ti lingac todësch, talian y inglesc, elaboraziun de documënc y tesć por proiec de educaziun ambientala, ajornamënt di mesi d'informaziun digitai, laur tecnich y aministratif. Por podëi fá le sorvisc él nezesciar da avëi 18 agn, da avëi rové les scores d'oblianza, da avëi l'atestat de bilinguim o trilinguism C y la portignënza a n grup de lingaz y da avëi la residënza tl Südtirol. Les proes a usc por l'amisciun gnará plüssigü tignides ai 6 y ai 7 de aurí, i candidac pó s'arjigné ca ales proes cun le material didatich informatif (che ti gnará mené a vigni candidat döes edemes dan les proes) desponibl al Ofize Parcs naturai. De plü informaziuns é da ciafé sön la plata internet: www.provincia.bz.it/natura-territorio/temi/parchi-naturali.asp. Denant co scomencé cun le sorvisc messará i candidac tó pert a n curs de formaziun che gnará tigní plüssigü ai 26, 27 y 30 de má y ai 03 de jügn. Les domandes ti pó gní ortiades cina les 12.00 de ai 04 de merz al Ofize Parcs naturai (strada via Renon 4, Balsan). I formulars é da ciafé sön internet tlican chiló, o ince tles sëntes di Parcs naturai a Al Plan de Mareo (tel. 0474 506120), Balsan (tel. 0471 417770), Maran ( tel. 0473 252255), Bornech (tel. 0474 582330) y Valsperch-Taisten (tel. 0474 947360). |
 | FotoClub Val Badia – Strada Pares, 10 – 39030 La Val – Cod.Fisc.: 98020920218 - mail: fotoclubvalbadia@rolmail.net
|