Home - News - Cura dla contrada: revoché le stop ai contribuc
image125Cun l'aprovaziun di criters nüs á la Junta provinziala trat zoruch l'architada di contribuc por la cura dla contrada. „Cun chësta mosöra orunse renforzé le sostëgn ala conservaziun dla contrada culturala rurala ince defora di raiuns sot a sconanza", sotrissëia l'assessur provinzial por l'ambiënt Richard Theiner.
Les domandes de contribut reverda i intervënc de mantignimënt y de cura dl paesaje defora di raiuns sot a sconanza y fej referimënt a sis de lëgn, tëc cun scianores o de stran, mürs de pera sëcia, conservaziun de monumënc culturai rurai, canai d'irigaziun naturai y d'atri ogec por chi che al é preodü n finanziamënt aladô dla sconanza dl paesaje. Por chëstes categories á la Junta provinziala aprové, te na sentada a Trënt porvia di laurs dl Consëi regional, diretives nöies por la conzesciun di contribuc.

Al vëgn insciö anulé la sospenjiun dla conzesciun di contribuc stabilida tl mëteman dl 2014 deache i mesi finanziars a desposiziun ne podô nia garantí le paiamënt dles premies de cura dl pesaje te na perioda de tëmp adatada. N'ezeziun é gnüda fata por i contribuc conzedüs por intervënc ti raiuns cun na sconanza particolara ti raiuns Natura 2000, ti parcs naturai, pro i momumënc naturai y i biotops, por chi che la Junta é stada buna da ciafé dan da n ann i fonds nezesciars.

Cun la deliberaziun da incö vëgnel insciö indô conzedü la poscibilité da paié fora contribuc provinziai che reverda la cura dl paesaje defora da raiuns sot a sconanza. Les domandes podará gní presentades plüssigü dai 15 de jená dl 2016 inant. „Tl tëmp passé él sté meso da paié fora les spëises bele aprovades y porchël él sëgn poscibl da daurí indô le fonds por les domandes", á splighé l'assessur provinzial Richard Theiner.