 Cun la fin dl mëis d'otober s'ál stlüt jö la sajiun dles Ciases de vijita di parcs naturai dl Südtirol: le program de scomenciadies é sté dër ampl ince chësc ann, da alzé fora él danterater i dui cursc de fotografia metüs a jí en colaboraziun cun l'assoziaziun Federparchi. Le resultat: bëgn plü de 10mile retrac dles belëzes dla contrada y dla natöra „made tl Südtirol".Ai dui cursc de fotografia ti parcs naturai dl Südtirol ál tut pert de plü fotografs dla plataforma internet pixcube.it da döta la Talia. I cursc é gnüs tignis un tl Parch natural Trëi pizes de Lorëi y l'ater tl Parch natural Pöz-Odles cun indöt 10mile fotografies realisades. „Les imajes nes mostra nia ma la belëza dla contrada de nostes munts, mo ares é ince le miú retrat dles carateristiches y dla biodiversité de nüsc parcs y sará ince na documentaziun de gran valur por les generaziuns che vëgn docá", spliga le diretur dl Ofize Parcs naturai Renato Sascor. La publicaziun dles fotografies sön i social network y sön les plataformes de pixcube.it ti dará ince na gran visibilité ai Parcs naturai dl Südtirol sura döt le raiun dla Talia. „I dac che i un a desposiziun confermëia n numer de 50.000 contac por vignun di dui cursc y propi por merit de chësc gran suzes él bele preodü n'ediziun nöia dla scomenciadia tl 2016", insciö Sascor. Les porsones interessades da tó pert a un di cursc de fotografia ti parcs naturai dl Südtirol dess prëibel contaté l'Ofize Parcs naturai, strada via Renon 4, a Balsan (0471 417770 - parchi.naturali.bolzano(at)provincia.bz.it). |
 | FotoClub Val Badia – Strada Pares, 10 – 39030 La Val – Cod.Fisc.: 98020920218 - mail: fotoclubvalbadia@rolmail.net
|