Home - News - Mostra sön les Dolomites UNESCO, 28mile vijitadus te n ann
image123322Da presciapüch n ann é la mostra permanënta sön les Dolomites patrimone UNESCO daverta tla Ciasa dl Parch natural dles „Trëi Pizes de Lorëi" a Toblach. Tl pröm ann é la mostra gnüda vijitada da 28mile interessá, n resultat che portará ala nasciüda de atres strotöres sön chësta tematica tl Comun de Funes y sön la Munt de Suc.
Indöt 28.000 é stá chësc ann i vijitadus ala mostra permanënta nöia sön les Dolomites patrimone UNESCO tla Ciasa dl Parch natural a Toblach. Na gran pert di vijitadus é ince stá scolars y scolares. La mostra é gnüda istalada te n frabicat a pert nü cun na spersa de indöt 250 metri cuadrac che tematisëia les Dolomites sciöche patrimone mondial. „L'obietif dla mostra é chël da sensibilisé i vijitadus sön la formaziun dles Dolomites, dala nasciüda dles munts da n mer tropich cina ala situaziun atuala", insciö la colaboradëssa dl Parch natural „Trëi Pizes de Lavarëi" Maria Margareth Pallhuber.

La mostra é partida sö te plü ciantuns tematics, che porta da na introduziun generala sön la tematica cina ala formaziun dles Dolomites dl Sest, ales spezialités geomorfologiches dla pera dolomitica spligan ince le significat dl titul patrimone mondial UNESCO. Cun videos, animaziuns y material visif ti vëgnel pité ai vijitadus n'odüda multimediala dla tematica. „La mostra é stada n contribut important por che düc i interessá pois s'informé sön les Dolomites y süa sconanza", chësc le bilanz positif de Pallhuber do le pröm ann dala daurida.

Por pité ciamó de plü informaziuns te chësta direziun él preodü la realisaziun de plü frabicac d'informaziun, le pröm de chisc tl Comun de Funes che gnará completé ciamó cina la fin dl ann. Y ince tl zënter dles vijites nü dl Parch natural Scilier-Ciadinac él preodü da ti dediché na seziun aposta ales Dolomites patrimone mondial UNESCO. „Te chësta manira orunse sensibilisé la jënt dl post y i ghesć che vijitëia nüsc parcs naturai sön l'importanza dles Dolomites y dla denominaziun patrimone mondial UNESCO", spliga Enrico Brutti, le diretur dl Ofize Parcs naturai.