 Sön la munt dl Strudelkopf (nia dalunc da Toblach) tl parch natural Fanes-Senes-Braies á l'Ofize Parcs naturai, adöm cun la Fondaziun Dolomites UNESCO y de plü ofizi provinziai, realisé la pröma terassa panoramica dles Dolomites patrimone mondial. L'assessur Richard Theiner, presidënt dla Fondaziun, tignará l'inauguraziun dl punt panoramich nü en jöbia ai 27 d'agost. L'odüda dala pröma terassa pita na panoramica spetacolara sön les pizes dles Dolomites dl Sest y de Braies, di Cadini y dl Cristallo dlungia Ampëz. Al se trata dla pröma de na seria de terasses che gnará realisades te de plü punc cun odüdes panoramiches planificades en colaboraziun cun la Fondaziun Dolomites UNESCO. La terassa sön la munt dl Strudekopf/Monte Specie nia dalunc da Toblach é le pröm proiet y sará la basa por d'atri intervënc. La pröma terassa panoramica gnará insciö inaudada dal assessur provinzial Richard Theiner, ince presidënt dla Fondaziun Dolomites UNESCO, en jöbia, ai 27 d'agost, dales 11.30 sön la munt dl Strudelkopf (2.307 metri) tl parch natural Fanes-Senes-Braies adöm cun i ombolc de Toblach y Braies, Guido Bocher y Friedrich Mittermair. Do les parores de salüt presentará le diretur dl Ofize Parcs naturai Enrico Brutti y l'architët David Messner le proiet. L'alpinist y acompagnadú di sciori Erwin Stiner spligará plü avisa le panorama dles Dolomites. Le punt de racoiüda por la spazirada sön la munt dl Strudelkopf tl raiun de Toblach é dales 10.30 pro la ütia „Dürrenstein" che an arjunj te 30 menüc a pe dala plaza di auti dla localité Plätzwiese. La plaza da parché sará azessibla cina les 10, daldô sarál poscibl da adoré na coriera dala localité „Brückele". Dala ütia Dürrenstein cina la munt dl Strudelkopf döra la spazirada 45 menüc. AVIS por i media: operadus cun telecameres dess prëibel s'anunzié cina en mertesc ai 25 d'agost al numer de tel. 0471 417773 (Elisabeth Berger, Ofize Parcs naturai). Al gnará organisé n trasport di aparac tecnics y di operadus, n pice toch de 20 menüc messará a vigni moda gní fat a pe. |
 | FotoClub Val Badia – Strada Pares, 10 – 39030 La Val – Cod.Fisc.: 98020920218 - mail: fotoclubvalbadia@rolmail.net
|