Dües edemes dedicades ales munts cun deplö apuntamënć culturai y sportifs. Al ne manciarà sambëgn nia de vigni sort de intratenimënt por vire al miù le mëis de setëmber tl’Alta Badia.

Vire les Dolomites é na manifestaziun metüda a jì por le prüm iade da pert dl Consorz Turistich Alta Badia, tratan chëla ch’al vëgn pité deplö incuntades liades a nostes munts, gnüdes detlarades patrimone natural dl’umanité UNESCO tl ann 2009.

Dai 7 ai 22 de setëmber vëgnel organisé conzerć, referać y prejentaziuns tles sales manifestaziuns di paîsc dl’Alta Badia mo inće defora amesa la natüra ite. Le prüm apuntamënt é preodü por la domënia ai 8 de setëmber cun le conzert dl trio di cors da munt y le grup di cors da ćiaćia. La manifestaziun gnarà tignida dales 11:00 danmisdé tla cornisc idilica dla val Stella Alpina sura Calfosch.  Deplö sarà les incuntades, olache al vëgn mostrè foto dla natüra y de nostes munts: le lünesc ai 9 tla sala manifestaziuns da La Ila cun Paul Erlacher y Hans Pescoller dales 20:30,  le mertesc ai 10 tl salf F.A. Rottonara a Corvara adüm a Helmut Elzenbaumer dales 21:15 y dala medema ora la jöbia ai 12 de setëmber  a Calfosch, olache al vëgn mustrè les foto de Carlo Dapoz. Tratan la secunda edema é chisc i apuntamënć cun les proieziuns d’imajes: a Calfosch en lünesc ai 16 de setëmber dales 21 :15 cun Paul Erlacher, Helmut Elzenbaumer tignarà l’incuntada ai 18 de setëmber dales 21:15 tl salf dles manifestaziuns da Corvara y les foto de Alfred Erardi podaran amiré en jöbia ai 19 de setëmber tl salf J.B. Rinna a San Ćiascian dales 20:30.

La jona alpinista Tamara Lunger sarà la protagonista dl’incuntada preodüda por le mercui ai 11 de setëmber tl salf dles manifestaziuns da Corvara. Tamara é la plö jöna y la secunda ëla ch’à arjunt le Lhotse tl Himalaya.  En ocajiun dl referat “Dolceamaro”, che mët man dales 21:15, cuntarala de sües esperiënzes tles Dolomites mo inće fora por le monn. La secunda edema é caraterisada dala conferënza cun le jonn alpinist da La Plì de Mareo Simon Kehrer. La conferënza dal titul “Berge der Welt in 361 Grad” vëgn organisada le vëindres ai 20 de setëmber dales 20:30 tl salf dles manifestaziuns a San Ćiascian.  Trames les relaziuns vëgn tignides por todësch.

Nia ma conferënzes y proieziuns mo inće müjiga y melodies tradizionales caraterisëia l’inizaitiva “Vire les Dolomites”. En vëindres ai 13 de setëmber éle la müjiga da Badia adüm al cor Kérygma che tëgn n conzert, che gnarà acompagné da foto de paesajs. Le conzert mët man dales 21:15 tl salf dles manifestaziuns a Corvara. Les dües edemes de apuntamënć lià ales Dolomites vëgn stlütes jö cun le conzert amesa la natüra en domënia ai 22 de setëmber. Le trio di cors da munt y le grup di cors da ćiaćia da Luttach sonarà les plö melodies da munt dales 11:00 inant tla bela cornisc naturala sö La Crusc.

Intratan les dües edemes vëgnel inće pité deplö escursciuns adüm a na guida, sciöche l’atraversada dl parch natural Puez-Odle le mertesc o l’escursciun al ander dles laurs sön Conturines en program la jöbia. Deplö informaziuns y prenotaziuns pro les Assoziaziuns Turistiches. 

Fontana: www.valbadiaonline.it