 Da feter trëi enes à la Provinzia de Bulsan tëut tla man la presidënza dla fundazion che mëina l'arpejon Dolomites-Unesco, ai 8 de juni ie unì tenì la sëurandata ufiziela. A Toblach à l assessëur Elmar Pichler Rolle sëurantëut formalmënter la presidënza y à sorissà che l ti vën jit permez ala ncëria de defënder l'unicità dl raion Dolomitich cun n pensé che va sëura la sëides y la cumpetënzes ora.
Te chëla che l'arpejon Dolomites ne se fërma nia pra la sëides dla Provinzies (l raion reveda l Sudtirol y Trentin cun Belun, Pordenone y Undin), ne possa la fundazion "Dolomiti-Dolomiten-Dolomites-Dolomitis UNESCO" nia udëi si ncëira me per na provinzia sëula: "Messon udëi l raion dl'arpejon mundiela sciche dut un, scebën che la singula pertes se desferenzieia l'una cun l'autra – velch à n gran muvimënt turistich, d'autres ie feter nia abitedes" à dit Pichler Rolle che lecorda l duvier deberieda dat su dal'Unesco per mantenì l'unicità dla Dolomites. "Dal mumënt che la Dolomites ie abitedes y vën nuzedes dala persona, se tratela de les mantenì te n balanz danter defënder y nuzé", nsci l assessëur provinziel. Sëuraprò se tratela nce de abiné n consens danter la istituzions che aministrea l'arpejon mundiela tres la fundazion. Nsci dëssa nce la strutura interna unì adateda ala fundazion: "Pudëi tré ite duta la Istituzions – la cin provinzies y la doi regions – uniral adatà la cumposizion dl cumité de direzion y l cunsëi de aministrazion" à dit Pichler Rolle. Prësc dëssel vester n secreter generel a mené la fundazion. "L cuncors ie tl lëur de unì stlut ju", nsci l assessëur. Cun na strutura urganisativa nueva vëniel laurà sun doi cunzec generei. N iede se tratela de na strategia de management damandeda dal'Unesco che dëssa curì la pertes singules dl'aministrazion y dl svilup dl'arpejon: mubilità, turism sustenibl, furmazion, tueda y geologia nchin ruvé a cuntreda y raions sota defendura. L segondo majer ciamp de lëur reverda l svilup de na strategia turistica per dut l raion che dëssa mo ntan chësc instà giapé forma. Tl cajo spezifich dla Provinzia de Bulsan nunzieia Pichler Rolle doi ponc: la preparazion per tò ite la grupa de Saslonch tl raion dl'arpejon y na regulamentazion per i jëufs dla Dolomites.  Per i proscimi mënsc se an nce tëut dant nfurmazion y sensibilisazion deberieda ti ponc de majer muvimënt. Per lueges panoramiches dëssel unì purvà ora n prototip de na terassa panoramica. N cont de sensibilisazion uniral prejentà l'arpejon Dolomites sun fieres, mostres y manifestazions cun descuscions tl raion dolomitich y nce oradecà. "Pra l International Mountain Summit uniral rujenà dl potenzial dla merca 'Arpejon-Unesco', ajache n pert ne vën chësc mo nia udù ite" dij l assessëur fajan referimënt ala 188 lueges sun dut l mond recunesciudes dal Unesco. La Provinzia de Bulsan mëinerà la fundazion dl'arpejon Dolomites-Unesco per trëi ani, se cruzian dl'aministrazion, de ruvé a una cun la dezijions politiches y de coordiné i lëures per l svilup dl'arpejon. La presidënza ie unida pieda do da Belun. Fontana: Ufize Stampa dla Provinzia da Balsan |
 | FotoClub Val Badia – Strada Pares, 10 – 39030 La Val – Cod.Fisc.: 98020920218 - mail: fotoclubvalbadia@rolmail.net
|