Dla 285.000 euro che la Provinzia de Bulsan à chëst ann udù dant per l'arpejon mundiela Unesco ie 100.000 euro cuota anuela per la fundazion. L'autra pert vën adurveda per pruvedimënc y ativiteies tl Südtirol. Sun l program de lëur iel de purté inant la pratiches acioche la grupa de Saslonch y Mëisules posse deventé pert dl raion recunesciù dal Unesco. Acioche la ruve tan inant muessa i raions n cuestion n iede deventé parch naturel. I chemuns de S.Crestina y Urtijëi à bele delibrà de vester a una. N cont de Mëisules/Grupa dl Sella ne à i chemuns mo nia fat dumanda ufiziela. "Te chësc mumënt vëniel purtà inant la preparazion tecnica che Saslonch y l Sella devënte pert dl raion Dolomites-Unesco, ma chësc ne ie te chësc mumënt mo nia dat pro" à sorissà l presidënt dla Provinzia Luis Durnwalder.

Per chëst an iel da pert dla Provinzia de Bulsan udù dant na nrescida danter chëi che lëura tl turism y i vijitadëures coordineda dal'Academia europeica EURAC. L fin de chësta nrescida ie de capì tant che la jënt ie nfurmeda dl'arpejon mundiela y sce l ti vën nce pità tant che i se aspieta. N auter pruvedimënt sarà l mantenimënt di troies da mont y dla tofles ti raions dl'arpejon mundiela. D'autonn uniral fat pea l cunvëni nternaziunel IMS a Persenon se prejentan cun na sezion Dolomites-Unesco. Dlongia proiec sciche chël de fé na terassa panoramica y material didatich per la scoles mesanes, uniral nce cris la culaburazion cun l'autra provinzies. Tl ciamp dla mobilità ulëssen mëter a jì deberieda na plataforma digitela per l trasport publich.

L zënter vijitadëures tla cësa dl parch naturel a Toblach (Grand Hotel) dëssa unì ngrandì. Ti locai nueves uniral anjenià na mostra sun la Dolomites-Unesco. Velch da de tel ulëssen nce fé tl'autra cëses dl parch naturel.