USP - Tles proscimes edemes gnaràl metü a jì tröpes scomenciadies por informè sön les Dolomites Patrimone mondial UNESCO. A chësta moda po i comuns tl raiun dl patrimone mondial s’anuzé tl dagnì de infopoints laurà fora aposta, che l’assessur provinzial Michl Laimer à sëgn presentè. Implü déssel gnì tachè sö dlungia l’autostrada placac che oj l’atenziun sön le patrimone mondial. Implü gnaràl ince arjigné ca material didatich.

L’assessur por l’ambiënt Laimer à invié i rapresentanć di comuns dl patrimone mondial dl Südtirol, les lies da munt AVS y CAI, la federaziun por la sconanza dla natöra y dl ambiënt, sciöche inće le Geoparc Bletterbach, a na incuntada a San Martin por gnì informà sön i ultims svilups che reverda le patrimone mondial.
L’assessur provinzial Laimer s’anuzé dl’ocajiun por fà referimënt al impëgn cultural de sostignì le svilup sostenibl, lié al reconescimënt de patrimone mondial, te döt le raiun provinzial y nia ma tl raiun dl patrimone mondial.

"Le patrimone mondial ne mëss nia dagnora ma portè val’, al mëss dantadöt gnì vit y sintì", insciö Laimer. L’assessur provinzial à inće presentè i infopoints laurà fora por i comuns dal Ofize provinzial Parcs Naturai, che dà informaziuns sön l’Unesco, la geologia dles Dolomites, la contrada y le svilup dl turism, y che mostra retrać sön le raiun dl patrimone mondial dl Südtirol. "I comuns, le Geoparc Bletterbach y les cater ćiases di parcs naturai di parcs naturai dl patrimone mondial ciafarà chisc infopoints tles proscimes edemes", insciö Laimer. Implü vëgnel inće metü sö dlungia l’autostrada dl Prener tofles, che mostra le patrimone mondial, y an é tl laûr da laurè fora material didatich sön l’Unesco y na formaziun spezifica por i maestri de schi y i mënacrëp sön le tema Patrimone mondial Dolomites. Implü gnaràl metü a jì tles ćiases di parcs naturai dl raiun Unesco mostres sön le patrimone mondial. Ti ultimi mëisc ti él gnü surandè tofles aposta ales üties de munt ti raiuns Unesco, y al é inće gnü stampè placać di cin raiuns dl patrimone mondial dl Südtirol. Dlungia les entrades prinzipales él gnü metü sö de gragn portai, che fej referimënt al patrimone mondial. Dl’incuntada s’àn inće anuzé por recordè la poscibilité de deventè comëmber dla Fondaziun Patrimone mondial. Le regolamënt y le formular d’adejiun ti é gnüs ortià dan da püch ai comuns y ales lies de sconanza, y é da ciafè sön la plata internet dla fondaziun (www.fondazionedolomitiunesco.org).

Fontana: Ufize stampa dla Provinzia de Bulsan