La sabeda ch’é stada, ai 5 de novëmber, él gnü inauguré a San Martin tla sënta dl Istitut Ladin na bela mostra de fotografies dal tema „Ciüfs“. Tla mostra él gnü metü fora i 30 plü bi retrać chiris fora danter 280 fotografies che é gnüdes menades ite por le concurs dal medemo tema, scrit fora dal Fotoclub Val Badia por le 2011.

Danter les fotografies dades jö nen n’êl cotantes de beles y por la juria metüda adöm da fotografs de natöra conesciüs te Südtirol y sura döta l’Europa sciöche Norbert Scantamburlo y Sepp Hackhofer, y dai rapresentanć dl Fotoclub Carlo Dapoz, Pia Pedevilla y Werner Pescosta, n’él nia stè tan saurì da chirì fora les 30 plü beles che dô ciafè lerch tla mostra y dantadöt les prömes 10 da premié. Porchël à la juria valuté avisa, retrat por retrat, ćiaran a de plü aspeć: l’impostaziun dla fotografia, la löm y i corusc, les particolaritês y l’unicité dla fotografia, süa espressivité y inće l’idea dl fotograf. Al à orü ester n valgönes ores por rové ala dezijiun finala che à premié sciöche miù fotografia chëra de Alfons Elzenbaumer da Rina, che s’à tlassifiché dan da Alfred Erardi da La Val/Ehrenburg y Helmut Elzenbaumer da La Val. Danter les prömes 10 él spo ćiamò rové ite les fotografies de Günther Pizzinini de Badia, Ivan Castlunger da San Martin, Pire Ploner de Badia, Zeno Tolpeit y Franz Dapoz da La Val.

En ocajiun dla premiaziun dl concurs 2011 él inće bele gnü antizipé le tema dl concurs por l’ann 2012 che é „Le corù cöce“ y chël por l’ann 2013 che é „Le corù blanch“. Insciö pò düć i fotografs interessà bele mëte man de se fà pinsiers sön ći fà jö y de fotografè por abiné fora de bi motifs.

La mostra de fotografies „Ciüfs“ restarà daverta tl salf dl Istitut Ladin „Micurà de Rü“ a San Martin ćina ai 20 de novëmber 2011, dal lönesc ala jöbia, dales 10 ales 12 y dales 15 ales 17, y le vëndres dales 10 ales 12. Düć i apascionà de fotografia y chi che à ligrëza cun i ciüfs y la natöra é dër bel invià da gnì a ti ćiarè.

Por le Fotoclub Val Badia
Werner Pescosta 

Por l'impostaziun dla fotografia, l'armonia de formes y de corusc  é la fotografia de Alfred Erardi  gnüda premiada cun le secundo  pest.	Cun chësta bela fotografia de  n ciüf plütosc rer tles Dolomites à Alfons Elzenbaumer davagné le concurs 2011.	Helmut Elzenbaumer à arjunt le terzo post cun na bela  fotografia de n ćiamp de pavè, olache na cornisc de spisc alza fora la belëza dla flu.

Por udëi i partezipanć che á tut pert drüca: partezipanc_concurs_2011.pdf