Defat é les fotografies de chësc ultimo liber gnüdes fates danter le delta dl Po a süd y Finland y Island a nord. N’atra novité é inće la conscidraziun de ći che alda döt cant pro le tier: so ambiënt, sües tanes, i posć olach’al vir y olach’al s’ascogn. Al n’é porchël nia ma plü i tiers da susc tl zënter dles fotografies, mo al é por le plü motifs de ambiënć olache i tiers se lascia val’ iade odëi, sc’an à paziënza d’aspetè. La lerch vitala y le tier devënta döt un y val’ iade mëssun feter i ciarè dui iadi al retrat por odëi fora le tier. 

Le Strix aluco – che foss la ciuita de bosch por latin – é le simbol che liëia adöm te na uniun i fotografs de natöra de Südtirol, indöt passa 80 fotoamaturs, danter todësc, talians y ladins, che s’incunta regolarmënter a fà jö y a ti ćiarè a fotografies.

Do 15 agn da canche chësta uniun é gnüda metüda sö s’incunta sü mëmbri dötaorela ćiamò n iade al mëis por se baratè fora esperiënzes y mostrè sües fotografies, che vëgn comentades deboriada. En ocajiun de chëstes incuntades vëgnel spo inće planifiché les escurjiuns por jì a fà jö. Te val’ ocajiun vëgnel inće invié fotografs conesciüs sura döt le monn che azetëia dagnora ion l’invit. N iade al ann vëgnel inće metü a jì n concurs fotografich, olach’al vëgn premié le fotograf dl ann.

Le club fotografich di Strix s’à fat dër n bun inom ti ultimi agn, inće foradecà, tres la partezipaziun y le suzès arjunt pro i concursc nazionai y internazionai. Plü gonot él porchël inće gnü damanè mëmbri di Strix da tó pert ales iuries di concursc internazionai. Insciö ciafon tres indô contać nüs y motivaziun nöia da jì inant.

Impò ne fóssel döt cant nia, sc’al ne foss nia la ligrëza cun la natöra che i fotografs de Strix prô vigni iade ch’ai va a fà jö chilò te Südtirol, mo inće foradecà, sciöch’an po odëi da chësc liber nü, che mostra sö döta la competënza fotografica y naturalistica di fotografs, mo inće süa creativité y autentizité.