 La sabeda ai 20 d’otober él gnü daurì tl Istitut Ladin Micurà de Rü a San Martin la mostra de fotografies dal titul „Lëgns, lëgn y lignan“ organisada dal Fotoclub Val Badia. I retrac metüs fora é chi ch’é gnüs menà ite por le concurs dal medémo titul scrit fora dal Fotoclub por le 2007 a chël che bëgn 43 fotografs à tut pert.Tone Rungger dla Verda Forestala d’Al Plan à sotrissé l’importanza dl bosch y la valüta dl lignan y ti à dè a chësta mainira plü pëis al tema dl concurs. I pröms 10 tlassificà à spo podü pié do i pesc. Norbert Scantamburlo da Bornech, che ne vëgn nia por cajo aratè danter i mius fotografs de natöra de Südtirol, à podü pié do le pröm pest, mirité cun na fotografia che mostra la belëza de n bosch tl ciarü. Karin Pizzinini da Calfosch é rovada secunda cun na fotografia che atoca deplëgn le tema dl concurs: taies y lëgna arjignà ca da scialdè la stüa tratan l’invern. Terzo é rové Vito Miribung da Urtijëi cun n retrat che mët en evidënza les vëtes dl lëgn y les sfësses ch’al tira canch’al é n iade gnü taié N jolan và incè al Istitut Ladin Micurà de Rü y ala Cassa Raiffeisen Val Badia por le sostegn che al i vëgn dè al Fotoclub Chi ch’à interès po ciafè deplü informaziuns sot a www.fotoclubvalbadia.ladinia.net. |
 | FotoClub Val Badia – Strada Pares, 10 – 39030 La Val – Cod.Fisc.: 98020920218 - mail: fotoclubvalbadia@rolmail.net
|