Sëra de dias cun Pia Pedevilla, mostra y premiaziun dl concurs fotografich dal titul „söl iade“
Le Fotoclub Val Badia inviëia düc i interessà y i apascionà de fotografia ai 13 de novëmber, dales 20.30 tl Istitut Ladin „Micurà de Rü“ a San Martin, a na sëra de diapositives cun Pia Pedevilla. Sciöche düć sa, laôra Pia sciöche dessegnadëssa y é conesciüda deache ara à bele dè fora zacotan de libri, mo danter sües pasciuns plü granes àlda ince la fotografia, a chëra ch’ara po mâ se dediché tratan les vacanzes.
En ocajiun dla sëra metüda a jì dal Fotoclub lasciarà Pia odëi retrać ch’ara à fat dan da n valgügn agn tratan sü iadi tres la Polinesia, Papua Nöia Guinea, Indonesia y Cina. Por la maiù pert él posc olache i turisć ne röia nia, olache le turism de massa ne n’é indî nia ciamò conesciü. Pia i à vijità deboriada cun so chestian, cun chël ch’ara à dagnora organisé i iadi olach’ai stô fora val’ iade dui mëisc. Danterite y danterfora àra fat fotografies de contrades esotiches, mo te sü retrac vëigon plü gonot porsones y popolaziuns dër particolares.
A Pia ti à salpü interessantes les isoles de Flores y de Komodo, olach’ara à fat jö i gragn varanns, mo le plü ti à plajü la Papua Nöia Guinea y les isoles Salomon, olach’ara à messü se arjigné na canoa por ester buna de rové da n post al ater. Dailò ara dagnora dormì pro la jënt y à sciafié da fà de bi retrac de vita da vignidé de chi ëi depënć sö, mo inće de ëres y mituns che vir ćiamò bindebó ala salvaria. Particolara ti à ince salpü la Cina dl nord, olache la jënt vir ćiamò te tribùs y é dër tacada a sües usanzes y tradiziuns. Pia dij ch’al é plü saurì por n’ëra da ti rové pormez a d’atres ëres y ai mituns: dai ëi se tëmi y s’un sciampa. La fotografa da San Martin à chirì fora les dias a na manira da presentè le raiun danter l’Ozeania y la Cina, cun sües realtês desvalies y sü paîsc che va dai plü zivilisà a chi che n’é daldöt nia zivilisà.
Le Fotoclub Val Badia tol l’ocajiun por Ves invié inće ala mostra y ala premiaziun dles fotografies dl concurs da fà jö 2008 cun le tema „Söl iade“ ai 8 de novëmber dales 18.00 tl Istitut Ladin „Micurà de Rü“ a San Martin. Pro le tema tómel ite retrac da chi ch’an capësc fora che la porsona che i à fac ê söl iade da jì invalgó.
Ai po mostrè posc dalunc o daimprò, olache an passa canch’an é „söl iade“ … La mostra restarà daverta dai 8 ai 21 de novëmber, dal lönesc al vëndres dales 8.00 ales 12.00 y dales 15.00 ales 17.00.
Placat.pdf
