La sabeda ai 9 de novëmber él gnü inauguré tl Istitut Ladin „Micurà de Rü“ a San Martin la mostra dl Fotoclub Val Badia dal tema „Söl iade“, olach’al é gnü metü fora les plü beles fotografies ch’é gnüdes menades ite por le concurs de fotografia metü a jì dal club por le 2008. Indöt él stè 19 fotografs ch’à tut pert al concurs, menan ite fotografies de vigni sort, aladô de sciöche vignun à interpretè le tema ch’ê gnü dè dant.

Davagné à Günther Pizzinini de Badia, dan da Alfred Erardi da La Val/Ehrenburg y Paolo Erlacher d’Al Plan. La medaia de lëgn ti é jüda en chësc iade a Roswitha Crazzolara da La Ila che ti é rovada dant a Lucas Moroder de Gherdëna. Danter i pröms diesc é inće rovà Rudi Moling da San Martin, Albina Sottara y Vito Miribung da La Val. Indöt à les döes manifestaziuns, le concurs y la mostra, sciöche inće le program portè inant intratan l’ann, albü valgamia n bel suzès, dilan inće al sostëgn finanziar che ti vëgn bele da plü agn conzedü al Fotoclub dala Cassa Raiffeisen Val Badia.

Tosc sarà inće le calënder dla Cassa Raiffeisen Val Badia por le 2009 dan man, calënder che le Fotoclub dëida bele da plü agn incà da mëte adöm. Le tema dl calënder é chësc iade „Formes y corusc dla natöra“ y i mëmbri dl Fotoclub s’aôda ch’al pois Ves plajëi.

Por l’ann 2009 sarà le tema dl concurs da fà jö: „Vita da incö, storia da indoman...“. Le tema ti lascia tröpa lerch ala fantasia y ala creativité di fotografs che podarà fà jö döt ći ch’ai mina che sides ciamò al dédaincö y che ne sarà nia plü indoman, deache al fej oramai pert dla storia. Le Fotoclub oress porchël bele śëgn Ves invié da ponsè do y a mëte man de fà jö, por tó spo pert al concurs...

Foto: I pröms trëi tlassificà dl concurs 2008 (dmc.) Alfred Erardi, Günther Pizzinini, Helmut Elzenbaumer (presidënt dl Fotoclub) y Paul Erlacher. Iadedô i retrać cun chi ch’ai é rovà sön podest...