In chësc ann ê le tema prinzipal: CIÜFS
Dessot él da odëi les fotografies di pröms trëi tlassificà.
La sabeda ch’é stada, ai 5 de novëmber, él gnü inauguré a San Martin tla sënta dl Istitut Ladin na bela mostra de fotografies dal tema „Ciüfs“. Tla mostra él gnü metü fora i 30 plü bi retrać chiris fora danter 280 fotografies che é gnüdes menades ite por le concurs dal medemo tema, scrit fora dal Fotoclub Val Badia por le 2011.
Sciöche bele da de plü agn incà à le Fotoclub Val Badia scrit fora inće por l'ann 2011 n concurs da fà jö che dëida valorisé la cultura da munt, le raiun y le patrimone natural dles Dolomites. Y deache le tema „CIÜFSiüfs" i lasciâ tröpa liberté ala fantasia, ala creativité y al savëi da fà jö de vigni fotograf, él inće stè valgamia tröc che à tut pert: indöt à 74 fotografs, por le plü dla Val Badia, mo inće de Gherdëna y de Puster, menè ite sü retrać.
Danter les fotografies dades jö nen n'êl cotantes de beles y por la juria metüda adöm da fotografs de natöra conesciüs te Südtirol y sura döta l'Europa sciöche Norbert Scantamburlo y Sepp Hackhofer, y dai rapresentanć dl Fotoclub Carlo Dapoz, Pia Pedevilla y Werner Pescosta, n'él nia stè tan saurì da chirì fora les 30 plü beles che dô ciafè lerch tla mostra y dantadöt les prömes 10 da premié. Porchël à la juria valuté avisa, retrat por retrat, ćiaran a de plü aspeć: l'impostaziun dla fotografia, la löm y i corusc, les particolaritês y l'unicité dla fotografia, süa espressivité y inće l'idea dl fotograf. Al à orü ester n valgönes ores por rové ala dezijiun finala che à premié sciöche miù fotografia chëra de Alfons Elzenbaumer da Rina, che s'à tlassifiché dan da Alfred Erardi da La Val/Ehrenburg y Helmut Elzenbaumer da La Val. Danter les prömes 10 él spo ćiamò rové ite les fotografies de Günther Pizzinini de Badia, Ivan Castlunger da San Martin, Pire Ploner de Badia, Zeno Tolpeit y Franz Dapoz da La Val.
En ocajiun dla premiaziun dl concurs 2011 él inće bele gnü antizipé le tema dl concurs por l'ann 2012 che é „Le corù cöce" y chël por l'ann 2013 che é „Le corù blanch". Insciö pò düć i fotografs interessà bele mëte man de se fà pinsiers sön ći fà jö y de fotografè por abiné fora de bi motifs.
La mostra de fotografies „Ciüfs" restarà daverta tl salf dl Istitut Ladin „Micurà de Rü" a San Martin ćina ai 20 de novëmber 2011, dal lönesc ala jöbia, dales 10 ales 12 y dales 15 ales 17, y le vëndres dales 10 ales 12. Düć i apascionà de fotografia y chi che à ligrëza cun i ciüfs y la natöra é dër bel invià da gnì a ti ćiarè.
Por odëi le regolamënt dl concurs: Regulament_concurs_2011.pdf
Por udëi düć i partezipanć drüca: partezipanc_concurs_2011.pdf
I fotografs dla Val Badia che s’à tlassifiché cun sü retrać danter i pröms 10: (dmc) Franz Dapoz, Alfred Erardi, Helmut y Alfons Elzen
1. post: Alfons Elzenbaumer
Cun chësta bela fotografia de n ciüf plütosc rer tles Dolomites à Alfons Elzenbaumer davagné le concurs 2011. 2. post: Alfred Erardi
Por l'impostaziun dla fotografia, l'armonia de formes y de corusc é la fotografia de Alfred Erardi gnüda premiada cun le secundo pest. 3. post: Helmut Elzenbaumer
Helmut Elzenbaumer à arjunt le terzo post cun na bela fotografia de n ćiamp de pavè, olache na cornisc de spisc alza fora la belëza dla flu.
Dessot pon ciafè la galeria de fotos che é gnüdes dades jö dal concurs dal ann 2011. Les fotos é gnüdes "gescannt" porchël pol ester che la risoluziun ne sides nia otimala. Les fotos é gnüdes metüdes ite a cajo, nia dô la tlassifica.
|
