Freddy Sottara, nasciü a Bornech ai 26/02/1985. Vir a La Val y laora sciöche dependënt dla Cassa Raiffeisen Val Badia. Edith Ellecosta, nasciüda a Porsenú ai 10/11/1988. Vir a La Plí y laora sciöche infermiera. Tl tëmp lëde se dai ince jö trami dui cun la fotografia. I tems prinzipai é paesaji, tiers y "macro" te Südtirol.
Helmut Elzenbaumer é nasciü tl ann 1962 y é chersciü sö a Tintal. Sëgn virel a La Val y laora sciöche tistler. Tl tëmp lëde se dal ince jö cun la fotografia dla natüra. Suradüt ti posć locai. Contrades, tiers y macro á priorité por Helmut.
Ivan Castlunger, nasciü tl ann 1973 y vir a San Martin. Ivan é un di prüms che á daidé mëter sö le Fotoclub Val Badia. Al á bele metü man da fá jö analog tl ann 1996, spo dopo el passè sciöche prësc düć ala fotografia digitala. I tems prinzipai é tiers, contratdes y "macro" ince te posć plü dalunć.
Paul Erlacher é nasciü tl ann 1972. Al laora sciöche dependënt tla Cassa Raiffeisen Val Badia. Al é bel da tres apascionè di crëp y dal ann 2002 ince apascionè de fotografies. Le plü bel resultat arjunt é en secundo post pro le concurs internazional "Asferico" tl ann 2007. I tems prinzipai é tiers, contratdes y ciüf.
Pire Ploner, vir a Badia. Tl tëmp lëde se dal jö cun la fotografia, suradüt de tiers chiló da nos.
Zeno Tolpeit, nasciü y vir a La Val tl ann 1969. Al laora sciöche dependënt dl Comun da La Val. Al fesc jö bel da en grüm d' agn, bele da canche al ê pice. Mo ti ultimi agn al scopri danü la belëza dla natüra. I tems prinzipai é tiers, contratdes y "macro" ti posć nia dër dalunć da ćiasa.
Mi monn dla fotografia
La fotografia se mostra sciöche nos ti ćiarun ales cosses y por ći che nos ùn interès. Chël ó dì che les fotos che i ùn memorisades te nos instësc, se influenzëia canche i adorun le aparat da fà jö. Cun nüsc edli sun nia bugn da odëi döt, mo i se chiriun fora ći che tira nosta atenziun. Porchël él vignun che fej d'atres fotografies, y chël é val' de bel. Ti ćiarè ales cosses, se tó tëmp, chëra é la pröma regola che i messun imparè, sce i orun se dè jö cun la fotografia. Spo saràl nosta fantasia y d'atri faturs che se daidarà fà la foto y da ciafè le dër momënt por druché söl aparat. Interessant él da odëi sciöche nos tolun sö les cosses a chëres che nos ti ćiarun, ći sozédel pa te nos? La porsona müda süa filosofia cun les esperiënzes, porchël é les fotografies dagnora atramënter. Messun odëi les cosses cun nosta fantasia y soms, chël ó dì atramënter, deache ma chël se dëida jì inant tla fotografia. I retrać dess trà l'atenziun de chi che ti ćiara, bel plan dess la fotografia gnì descurida, al dess nia ester chël monn dla prescia che an vëiga ti media. La fotografia dess mostrè nosc monn, te chël che nos viun. Le fotograf dess nia jì do al mainstream, mo al mëss ester se instës, canche al laora cun le aparat da fà jö. A düć chi che à ligrëza da fà jö ti aodi tröpa sodesfaziun!
|
