Home - Consëis da fà jö - Önejima leziun
Portfolio

Ći se vëgnel pa insigné te chësta leziun?

Pordërt n'é l'önejima leziun nia na leziun sciöche chëres da denant. Ara dess plü co ater dè inant n valügn pinsiers sura la fotografia y le fà jö, dantadöt sura le „portfolio". 

Fotonr78
Collage de 4 fotografies.
 
Śoghede

Tles ultimes leziuns él gnü baié tröp de detai tecnics, composiziuns y regoles. Dessigü n gröm de argomënć interessanć, mo an ne mëss nia savëi döt cant bel avisa da mëte man. Tan debota ch'an é bugn da imparè, da mudé tecnica y da se svilupé, chël depënn dal ritm personal de vignun. Plü gonot ch'an tol l'aparat tla man y fej jö, plü debota ch'an röia ite tl monn dla fotografia. Śoghede porchël cun osc aparat da fà jö, fajede inće fotografies spontanes.

Ponsè do

Les regoles che é gnüdes spligades tles leziuns da denant é sambëgn da tignì ite por ch'al garetes de bi retrać, mo val' iade mëss les regoles inće podëi gnì ignorades...

É n dër motif bele determiné danfora? No! Le dër motif é chël che vignun se chîr fora. La fotografia é de chësc vers na sort d'êrt. Al po ester che döt stimenëies pro na fotografia, dala löm, ala composiziun, ala metüda a füch, mo porchël n'él nia dit che ara ti plejes a chi che ti ćiara. Porchël él dantadöt important da fà naôta jö por sè instësc y nia por i atri y da ester braui de sües fotografies. Inće sce ares ne gareta tl pröm nia propi ala perfeziun, mësson fà inant y ćiarè de gnì tres mius. Fajéde porchël fotos, fotos, fotos. Tl monn digital ne n'él plü degun problem.

Porvéde da deventè döt un cun l'aparat da fà jö. Al foss dërt da ester bugn de manajè l'aparat da fà jö te na manira intuitiva, ch'an n'ais nia bira de ćiarè do vigni iade te n manual. Dërt fóssel inće da restè tres pro la medéma marca de aparat, nia ma deache insciö él dagnora i obietifs che passenëia, mo inće por s'ausé ite a öna na manira da manajè l'aparat.

Ćiaréde d'ester creatifs! Porvéde fora tröpes cosses, deache al n'é degügn limits. Damanéde inće i atri fotografs sc'al é cosses ch'i n'ëis nia capì o ch'i oresses aprofondì.

N ultim argomënt por stlü jö le curs: le „portfolio".

N „portfolio" é pordërt na mapa o n liber ilustratif cun i laûrs de n artist, mo al pò inće ester metü adöm da na ligna de fotografies sura n cer' tema. Tres n portfolio àn la poscibilité de mostrè sö döta la creativité ch'an à (ćiara por ejëmpl dessot, n ejëmpl de portfolio dal titul „gostè"). Tres n portfolio pòn inće cuntè na storia de fotografies, olache vigni fotografia, öna do l'atra, se cunta inant.

Fotonr79
 


Por desćiarié l'önejima leziun te n format PDF drüca: Leziun_nr.11.pdf