Home - Consëis da fà jö - Secunda leziun

Imparè da ćiarè

Ći se vëgnel pa insigné te chësta leziun?
La basa por la composiziun de na fotografia ëise bele imparè tla pröma leziun, mo chël é ma mesa la pert por ester bugn da fà n bel retrat. Laprò mësson inće ciafè le motif por podëi mëte man cun la composiziun. Chësta leziun dess porchël pité n valgönes idees sön co ch'an pò fà da d'abiné n motif interessant.

L'edl dl fotograf

La composiziun dla fotografia mët man cun le dër motif. Mo da le ciafè él val' iade plü saurì da dì co da fà o gonot él inće rî da le fà jö te na manira che ti plejes a chi che ti ćiara dedô al retrat. Gonot vëigon val' y spo ti van pormez y se pënsa: chësc é val' de bel y an fej bel debota na fotografia zënza stè bëgn dî a ponsè sura. Atramënter éra sc'an mët man de se damanè ći che fej fora na cossa o na situaziun tan interessanta y particolara y da ponsè co ch'an pò fà da alzè fora chësc tres la fotografia.

Por ejëmpl pòn tó cà i ciüfs, che é dagnora bi y porchël é vigni fotograf portè a i fà jö. Chësc pòn inće odëi sc'an ti ćiara ai forums fotografics, olache i ciüfs é dagnora presënć. Sce la fotografia gareta o no depëndel indere dal fotograf y dal'impostaziun ch'al é bun da ti dè. Chilò ciafëise n valgügn consëis:

Fajéde fotografies scëmples!

Por podëi avëi na buna composiziun ôl ester n motif tler, n tema evidënt o plü avisa n oget zentral.

Fotonr9
Ciüf lila: “Schnappschuss (man ciampa) vs. Fotografie (man derta)

 

Impröma vëigon na bela cioscia de ciüf, mo da ćiarè plü avisa s'intënon ch'an po inće se conzentrè ma sön les singoles flus, che se lascia fà jö dër bun. Le fotograf che à fat jö le retrat chilò dlungia à porvè de alzè fora na flù sóra, chirin fora na composiziun che mostra la flu bela da corù cun n funz de vërt doìa.
Fotonr10
 
 



Tolésse tëmp, ćiamò deplü…
 
Chësc secundo ejëmpl alza fora de plü poscibilitês da fà jö röses blanćes. Pro le pröm retrat à le fotograf orü mostrè la scemplité dla rösa, olach'an vëiga döt le ciüf cun n pü' de ghel amez. Da ti ćiarè plü dî al medémo ciüf é süa atenziun rovada sön i details dles flus y cun n obietif macro y l'aparat sön n statif àl spo podü les fà jö abinan inće les gotes d'ega che ê lassura.

Da fà jö de te' details adorun assolutamënter n statif che dëida tignì bel chît l'aparat, deache vigni spostamënt inće minim i fajess deventè turgheri. 

Fotonr11
 
Ciüf intier vs. detail
 

N consëi: tolesse tröpa dlaorela! Ćiarédi a Osc motif da vigni posiziun y da de plü punć d'odüda. Conzentresse y metéde a füch chël particolar ch'i orëis evidenzié. 


Al n'é mai massa tert
Ći che la fotografia à de bel é dessigü ch'an pò vigni iade imparè dai fai ch'an à fat. Al paia porchël inće la mëia da tignì sö les fotografies che ne dij nia por porvè de capì ći ch'ares à che ne va nia, ći ch'an ess podü impostè atramënter.

 Fotonr12
Sciöche ejëmpl podunse tó cà chësc retrat de fonguns. Le fotograf s'à odü fora le motif particolar, deache i fonguns é chersciüs sö belavisa sön n toch de müstl vërt sön n lëgn, y à fat la fotografia. 

 

 

 

Baldi ne s'àl nia tut dlaorela de otimisé la fotografia söl post. Ći destürba pa pordërt? Ći elemënt dla fotografia messass pa gnì mudé?

Dessigü é le doìa massa scür, mo al à inće massa „confujiun" laìte, cun chël ch'al é la pert scüra de n lëgn tomè y na pert indô dër lominosa vërda. Chësc destôl l'atenziun y ti tôl inće plastizité al grup de fonguns che va tröp a perde.

Dër saurì fóssera jüda da miorè la fotografia söl post, spostan le statif a na manira che le doìa ess ma plü albü corusc lominusc.

N consëi: sc'al é poscibl, scemplifichéde dagnora le motif y la composiziun le plü ch'ara va. Tröpes fotografies perd la forza d'espresciun canch'al é massa elemënć che n'alda nia pro le motif prinzipal. 

 
Ti ćiaré al motif da n ater punt d'odüda
Na cossa da nia, mo che po mudé cotan le retrat final, é le punt d'odüda. De regola, dantadöt sce ara se trata de ciüf o de plantes, éson ausà da les odëi da lassöjö. Porvéde da ti ćiarè da n ater punt d'odüda, insciö pò la fotografia garatè valgamia plü interessanta.

Fotonr13
Granëtes: da lassöjö vs. da ia por tera
 

Él damì da fà fotografies dl söijö o dl iaicà?
Val' iade se damanon sc'al é damì da fotografè dl söijö o dl iaicà. En pert pòl ester na cossa de „gusto", en pert pò öna o l'atra poscibilité de fà jö daidé evidenzié cer' particolars dl motif ch'an chir fora. Impò vëgnel fat jö tröp dl iaicà, deache la porsona é ausada da odëi les cosses te n format orizontal, é pö i edli un dlungia l'ater y nia un sura l'ater.

Fotonr14
Granëtes: fotografia dl söijö.
 


Por desćiarié la secunda leziun te n format PDF: Leziun_nr.2.pdf